بناء الانسان اولا

النهاردة شوفت فيديو لكوبرى روض الفرج الجديد الى اتكلف مليارات وفعلا شكله كويس جدا ... لكن فيديو النهاردة كان بيوضح حالة الكوبرى دلوقتى بعد مالحق به تخريب الناس ...الى كاتب اسمه ورقم تليفونه والى حافر قلوب والى سارق الزجاج المحيط بالمصابيح والى رامى زبالة على الارض

الحقيقة انا مااستغربتش لان ده سلوك طبيعى .. طول مانت بتبنى الحجارة وغير مهتم ولا تبالى ببناء الانسان دى هاتكون النتيجة المشكلة الأساسية فى تخلف بلدنا تكمن فى سلوك شعبها لازم بقى نفكر اولا فى تعديل سلوك هذا الشعب لازم تفكر ليه الناس دى كدة ... لازم تعالج الشعب ده قبل اى حاجة ... مهما صرفت وبنيت هتلاقى الى بيهد .. من اصغر موظف لاكبر مسؤل 90 فى المية من الشعب بيهد البلد الى بيبيع الاثار الى  و الى بيكتب على الحيطان الى بيرتشى الى بيبور الارض الى عايز يفهمنا ان الراقصة والبلطجى هما الشعب المصرى 

الموضوع بجد محتاج واقفة والفلوس اولا تتصرف لعودة التعليم والمدارس والمدرس وبث الانتماء والأفكار المتقدمة .. لو عملنا كدة الاول وبعدها بقى تبنى زى مانت عايز مش هاتلاقى الى بيخرب ويهد كل ماتبنى .. لو عندك عربية موتورها بايظ مهما غيرت لونها وعملتلها ديكورات وفرش جديد هى برده مش هاتمشى .. صلح الموتور الاول

البنا والشعب الاوفر

كل شعب له عاداته وصفاته.. ومن اهم صفات الشعب المصرى انه شعب اوفر ويهيص فى الهيصة حسب توجهاته وحسب من يوجهه ... محدش ابدا يختلف ان جريمه قتل محمود البنا جريمة بشعة واكيد نكدت على الناس كلها .. لكن الجريمة دى مش أبشع من جريمة قتل الطفلة زينة بعد اغتصابها ورميها من السطوح وساعتها عرفنا ان فى حاجة اسمها قانون الطفل والقانون ده مبنى على اتفاقات دولية .. ممكن نقول ان القانون ده ظالم ونتمنى اعادة النظر فيه .. لكن الهبل الى بيحصل ده ..يالا ياجماعة بسرعة اوعوا تناموا مفيش وقت نلحق حق محمود .. على اساس ان القاضى قبل مايحكم بيدخل على تويتر والفيس ويشوف الهاشتاج ويحكم بقدر عددها ..و المصيبة تلاقى ناس متعلمة مشتركة فى الهبل ده 

على اى اساس حكمتوا ان عشان اهله من الشرطة يبقى مسنود .. كام وزير موجود فى السجن ورؤساء جمهورية .. دا جد راجح  ده لو هو لواء شرطة فعلا هاتلاقيه اكتر واحد بيعانى دلوقتى من بعد الناس عنه ..محامى محمود نفسه قال انه اتأكد من السن من الشهادات الدراسية وشهادة الميلاد ..لكن ازاى بقى لازم نحط التاتش المصرى ونهيص ونشير شات مكتوب بين جد الولد بيدى اوامر حفيدى يخرج دلوقتى ..دا ولا افلام اسماعيل ياسين معقول لسة فى عقليات كدة .. سيبوا القاضى يحكم وفى النهاية هو بيحكم بقانون يعنى جريمة كذا وظروفها كذا تساوى عقاب كذا. . مفيش عندنا مصدر تشريع اسمه تويتر ولا فيس بوك ولا قانون الهاشتاج .. اهدوا بقى ربنا يهديكوا. .. دمنا بقى تقيل اوى وبتشمتوا فينا الدول المتقدمة وتقول هو دا الشعب الى ممكن نلعب بيه 

الجهر بالمعصية

كنت الاول بشوف لو انسان بيعمل ذنب ويدارى الذنب ده امام الناس كنت بشوف انه منافق .. لكن اتذكر يوم زارنا واحد متدين وملتزم وحان موعد صلاة المغرب وقمنا نصلى لكن هو قال لا انا هاصلى لما اروح المغرب مع العشاء ساعتها استغربت وبعدها لقيت نفسى لفترة لما اكون برة البيت وقت الصلاة اقول خلاص لما اروح اصلى واجمع الصلاة مع الى بعدها وكنت بقول فى نفسي ماهو فلان بيعمل كدة وهو متدين احسن منى ... . وكل ماكنت أأخر صلاة أفتكر الشخص ده .. وبعدين فكرت وحسيت ان الشخص ده عمل حاجة هو اعتبرها بسيطة وحسيت ان كل مرة بجمع الصلوات ان الشخص ده بياخد ذنوب 

قيس على الحكاية دى أى فعل بتعمله وخاصة لو معروف عنك الالتزام ... حسيت ان الى  يدارى الذنب أمام الناس والى كنت بعتبره انا منافق افضل بكتير من الجهر بالمعصية وأد ايه انت لما تجهر بالمعصية بتخليها صغيرة فى عين الى بيعملها وممكن تخليها سلوك طبيعى عند مجتمع كامل .. تخيل لو بداية معصية او سلوك سيئ كانت بسببك بمعنى ان واحد يقلدك والواحد ده يقلده غيره وغيره ..اذا بليتم فاستتروا .. لو لا قدر الله كنت مبتلى بسلوك خاطئ او معصية بلاش تجهر بيها ده مش نفاق ده من شأنه عدم انتشارها وجايز جدا ربنا سبحانه وتعالى يتوب عليك 

رفاهية الاكتآب وانتحار سوللى

كلما مرت أمامى حالة من حالات الاكتآب والتى يعقبها غالبا انتحار .. بفكر اكيد فى الاسباب المؤدية لذلك .. وحالة النهاردة كانت المطربة الكورية سولى ٢٥ سنة .. بنت مشهورة مطربة عندها ٦ مليون متابع ايه يخليها تكتأب ؟ مدير أعمالها حاول الاتصال بيها ولما فشل بلغ الشرطة راحوا لاقوها ميتة وقالوا انها غالبا انتحرت لمرورها بحالة اكتآب !!!! لو قارنت حالة البنت دى بحالة مثلا سيدة سورية عايشة فى معسكر اللاجئين ومعانتها اليومية فى ايجاد طعام لاولادها وغيرها من حالات كتير شبيهة تعرف ان الناس دى معندهمش رفاهية الاكتآب.. تخيل لو ان الست السورية  الى بنتكلم عنها دى توقفت للحظة وفكرت فى حالها وحست انها عايزة تكتأب ..بسرعة هاتلاقى صوت ولادها بيفكرها بالمسؤلية وينبهها ان مش من حقها تفكر وتستسلم للاكتآب..دى رفاهية غير مسموح بيها لأى انسان فى موضع المسؤلية ..وده يفسر ليه كل المنتحرين أو أغلبهم من أمثال سولى. . والا كان فى ملايين من حالات الاكتآب والانتحار كل يوم ..مش عارفة بصراحة دى حاجة حلوة ولا حاجة وحشة انك تكون مكتأب ومعندكش فرصة انك حتى تقعد مع نفسك وتفكر فى الاسباب  بالظبط زى انسان بيجرى وحد بيجرى وراه مهما تعب لازم يكمل لانه لو وقف يرتاح ممكن يموت 

فعلا الاكتآب رفاهية  

وهم السيارة النانو

من كام يوم قرات خبر عن ان فى شركة مصرية مقرها مذكور فى الخبر تستعد لبيع السيارة النانو والتى يبدأ سعرها من ٢٤ الف جنيه وبالتقسيط حتى انهم كتبوا نظام التقسيط الى هو فى متناول اى حد..طبعا انا قلت والله دى حاجة كويسة جدا ممكن تحل ازمة شباب كتير وترحمهم من بهدلة المواصلات .. لكن اولا لما سألت الشباب الغير قادر على تمن السيارات الايام دى لقيتهم رافضين بشدة فكرة انه يمتلك السيارة دى لا لشئ الا انه مكسوف من انه يبقى بيمتلك سيارة بهذا الحجم وكلهم اجمعوا انهم يتكسفوا يركنوها تحت البيت ... طبعا ده رد طبيعى لشباب بيشترى بكل فلوسه موبايل تمنه يساوى تمن العربية دى والله انا بشوف ناس حرفيا مش لاقية تاكل وماسكين موبايلات بيدفعوا فيها قسط ممكن يكون كل مرتبهم ... هو احنا امتى هانفوق من دور الفراعنة الى احنا عايشينه انا بشوف اوباما وهو بياكل قدامه طبق واحد فيه كل أكله وبشوف بساطة مارك وانشغال الناس دى فى أعمالهم وثقتهم فى نفسهم بفهم علطول ان فى حاجة غلط فى تربيتنا احنا مهما بنينا لا يمكن نتقدم الا ببناء الانسان اولا لسة بدرى جدا على تقدمنا خطوة واحدة للامام طول ما ده تفكيرنا 

المفجاة بقى ان السيارة النانو طلعت وهم ولا فى شركة ولا فى سيارة هاتنزل مصر فى ديسمبر .. ياللا بصراحة كانت هاتتبهدل معانا

ياللا ثورة

ادعو جميع فئات الشعب المصرى لعمل ثورة تبدأ من النهاردة ومن دلوقتى فئة المدرسين اخرجوا من السناتر وتوجهوا الى المدارس اعملوا الى عليكوا.. اشرحوا وكونوا قدوة ووجهوا التلاميذ للخير والامل وفكر ان التلاميذ دى فيهم ولادك واهلك .. وبعد الظهر من حقك تزود مرتبك ادى دروس للى ماستوعبش فئة الاطباء اخرجوا من عيادتكوا وروحوا المستشفيات وعالجوا المحتاج والقادر انت ممكن بكرة تمرض وتكون فى مكانه وبعد الظهر افتح عيادتك وزود دخلك موظف الحكومة محدش ضربك على ايدك عشان تكون فاسد ومرتشى وتاخد فلوس الرشوة تحج بيها وانت بكرة برده هايكون ليك حاجة محتاجها من موظف زيك تضطر تدفع الى خدته اعملوا ثورة على نفسكوا نصلح نفسنا ومجتمعنا كل حاجة هاتتحل شيلنا رئيس بعده رئيس ولو جبنا ١٠٠ رئيس حالنا مش هايتغير 

 الشعب يريد تغيير الشعب

جوجل تريند

النهاردة دخلت على موقع جوجل تريند .. لقيت ان اكتر كلمة بحث خلال الاسبوع الى فات هى الممر بنسبة ٤ أضعاف لأى كلمة بعدها .. الناس كلها عارفة ان الفيلم بيتكلم عن الحرب وانه مافيهوش ولا بلطجى ولا رقاصة ورغم كدة هو أعلى نسبة مشاهدة وده معناه ايه ؟ معناه ان الناس الى عايزة تقنعنا ان محمد رمضان وأمثاله والسبكى وأفلامه  هما دول ذوق الشعب المصرى بيكدبوا علينا مش هما دول الى بيمثلونا لكن الشباب المسكين مش لاقى غيرهم ..الناس دى بيضحكوا علينا عشان يداروا على عجزهم الفنى الناس دى بتستسهل وغير قادرين على الابداع ولما حد يلومهم يقولوا دا ذوق الجمهور .. أتمنى الرقابة ترجع زى زمان لأن الناس دى وأفلامهم هما السبب فى قتل محمود البنا وهما السبب فى وجود راجح وأمثاله 

قاطعوا أفلام البلطجة عشان ولادكوا